Ua fai mai le Reserve Bank a Niu Sila, o le 2023 a Niu Sila e ono avea ma tausaga o le a pa’ū ai lona tamaoaiga poo le recession.

O se tala mai lea a o faailoa mai ai ananafi le toe tuu i luga i le 75 points le OCR poo le official cash rate mai le 3.5% i le 4.25%.

O le sii o le official cash rate e faia lea ina ia faafoi mai ai le inflation poo le taugata o le soifuaga ua sii ai tau o oloa ma auaunaga ae sau ai i lalo le malosiaga o le tupe.

O se mataupu na avea ma faitotoa o osofaiga i totonu o le maota fono e pei ona fesiligia ai le minisita o tupe Grant Robertson e le sui o le National, pe a faafefea nei le toatele o tagata e iai mokesi lea o le a tigaina i le siitaga ua toe sau.

Mai le minisita o loo mafanafana o loo sili atu Niu Sila na i lo isi atunuu pe a faatusa le inflation o loo tatou ui ai, galuega ma aitalafu.

Ae mai le taitai o le National, Christopher Luxon, o se faanoanoaga le siitaga ua sau o le OCR ma o se siitaga aupito i maualuga foi lea ma ua mafua uma lea ona o le saoasaoa o le faaalu tupe a le malo.

Ae mo le OCR ma lana komiti a le faletupe, o se faiga o loo faamoemoe ia faapaleni ai le inflation.