I lenei foi vaitau o aso fiafia e mātele ina vaaia ai le taumafaina o le uaina ma ua talafeagai tonu foi ma le maua mai o le i’uga o se tasi o su’esu’ega sa faia i le uaina, lea ua faailoa ai o le sa’o o le aofa’i o le uaina e taumafaina e ono sili atu lea ona aogā nai lo isi fualaau o le fatu.

O le ausu’esu’e mai le Carlos III Health Institute i Spain na o latou su’esu’eina tagata e 1,232, i latou o loo iai le lamatiaga i gasegase o le fatu i totonu o le 5 tausaga ma e aofia ai ma i latou e taumafa tapaa, aafia i le toto maualuga, maualuga le cholesterol, soona puputa ma iai se tala’aga o le gasegase o le fatu i le aiga.

Sa faatumuina e i latou ia pepa fesili e faatatau i meataumafa, meainu ma aafiaga foi ia i latou.

E lē gata i lea sa faatino foi se ituaiga diet poo le tuuitiitia o le tausami e fesoasoani i le faatinoina o le su’esu’ega.

I le mae’a o le 5 tausaga o le su’esu’ega ua iloa ai o i latou sa taumafaina le uaina i se tulaga māmā aga’i i le feololo lona uiga pe ‘afa i le tasi le ipu uaina i le aso, ua faaitiitia foi i le ‘afa le tulaga lamatia o lona fatu pe a faatusa i tagata e lē taumafa uaina pe na o sina vaega itiiti foi.

O le su’esu’ega sa faatino i tagata matutua ma e ono ese foi se i’uga i isi e itiiti ifo tausaga.

Puna o Faamatalaga: https://www.9news.com.au/national/wine-heart-health-benefits-how-much-to-drink/55d152b0-eae8-43e5-8857-31a73469236a