Faafetai tele mo i latou ua fesootai mai ua mae’a ona faaulu o latou finagalo tusitusia e faaaogā ai le online submission link ma le imeli a le Palemene a Niu Sila: ga@parliament.govt.nz e lagolago i le pili taufaaofi i le Palemene o Niu Sila a le alii faipule ia Teanau Tuiono, le Restoring Citizenship Removed By Citizenship (Western Samoa) Act 1982 Bill, poo le tulafono taufaaofi e toe faafoi mai ai le sitiseni Niu Sila o tagata Samoa sa aveese faafuasei e Niu Sila i lana tulafono Citizenship (Western Samoa) Act 1982.

E na o le 53 submissions e lagolago ai le pili a Tuiono sa faamauina i le upega tafailagi a le Palemene i le Aso Gafua, talu ona tatala mai le avanoa.

Peitai o le taeao nei ua faamauina ai le 80 submissions faaopoopo.

E iai le talitonuga o lea ua amata solo mai submissions o la tatou taumafaiga tele lenei a Samoa potopoto.

E tatalo atu ai i le mamalu o Samoa e le gata i Niu Sila nei, ae faapea Samoa ma soo se tafa o le lalolagi o loo iai o tatou tagata e faapea…

O le lagolago o loo moomia e Teanau Tuiono o le tele lea o ni finagalo (submissions) e tuuina atu i le soakomiti (select committee) a le Palemene lea o le a o latou iloiloina lenei pili taufaaofi a o lei toe tuuina atu i luma o le Palemene a Niu Sila i lona tolaulauga lona lua.

• E faagata le faauluina o finagalo (submissions) i le Aso Faraile 31 Me 2024. O lona uiga e toe 10 aso o loo totoe.
• E lua auala e faaali ai finagalo…. O finagalo tusitusia (written submissions) poo finagalo tuufofoga (oral submissions).
• O loo faapipii atu le ata o le postcard ua tapenaina e le faipule ia Tuiono o loo iai faaupuga e lagolago ai le pili mo le faafaigofie mo le aumatutua ma le toatele o lo tatou atunuu, aemaise i latou o loo alala i Niu Sila. Na o lou suafa lava ma lou tuatusi e manaomia.
• Ae mo le toatele o lo tatou atunuu, aemaise i latou i Samoa ma isi vaega o le lalolagi; o loo i lalo faamatalaga ma le link e faaaogā mai ai le submission online.

POSTCARD SUBMISSION:

Mo a tatou ekalesia, mafutaga ma taupulega a aiga, faamolemole e faafesootai mai Teleiai (021) 618-042 poo le imeli edwin@puni.co.nz e maua atu ai postcard e mafai ona faatumu i le weekend nei ona toe ao mai lea i le vaiaso fou ina ia oo i Ueligitone a o lei tapunia submissions i le po o le Aso Faraile.

Faafetai tele i nisi o ekalesia ma mafutaga ua fesootai mai ma ua mae’a ona kiliva iai postcard anapo:

·         Father Michael Endemann: 600 postcard 

·         Pacific Leadership Forum (Laisene Fepuleai): 500

·         Li’amanaia Lorenzo (Malualii): 500

·         Fono Faufautua Samoa (Tofilau Ted Stanley): 200

·         Youth (Aigagalefili Tapuaí Fepuleai): 200