Na o Niu Sila lava le atunuu o le faiga faapaga ua ta’ua o le Five Eyes o lea na palota e lagolago le manaoga e tauala atu i Malo Aufaatasi e taofia ai le taua o loo faia nei a Isaraelu ma Gaza, ma ia faataga nei loa le auina atu o oloa i Gaza.
O le palota lea i le faaiuga o le vaiaso faatoa uma atu lea na palota ai Niu Sila faatasi ma isi atunuu e 120 e lagolago lenei finau.
Peitai, o se ioega na tu ese ai Niu Sila mai isi atunuu o loo i totonu o le Five Eyes, lea e iai Ausetalia, Kanata, Amerika ma Peretania.
O le finau a le Palemia o le paeaiga talu ai lea lava o loo faaauauina mai pea i le taimi nei, Chris Hipkins e le faapea ua alu ese mai ai Niu Sila mai le Five Eyes, ma e lē fou le tutoatasi o Niu Sila ma isi ana paaga.
Fai mai ai ma Chris Hipkins, o se faaiuga o lea lava na talanoa muamua i le faigamalo fou ua faasauni mai, a o lei faia.
