“E leai ma se isi na taofia ona o le solo a taavale lea na faia i le weekend e tapuaia ai faiva o a tatou tamafanau ia na taaalo i fafo,” o le saunoaga faamautinoa lea a le afioga i le Minisita o Leoleo i se faamautinoaga mai le komesina o leoleo, le afioga Leiataua Samuelu Afamasaga.

“E tasi lava le tagata na taofia, o le tamaitiiti na taofia e leoleo ona ua maua e leoleo sa iai ii i le taimi o le solo lea. Na taofia la e leoleo ona e iai se pepa a le faamasinoga e taofia mai ai ma loka mai ai, ona o le solitulafono o le talepe fale,” o le toe faaopoopo mai lea a le minisita.

O le faamautinoaga a lē o loo avea nei ma komesina o leoleo a o toesea ai komesina ma le sui komesina i atunuu mamao mo fonotaga, na ia ta’ua ai, o le tama lea na taofia ona ua leva ona saili e leoleo i le tusi saisai lea mai le faamasinoga, ae ua avea le tamoe ane i le solo lea i le faaiuga o le vaiaso, ua maua taitaia ai loa e leoleo sa fiu e sue, ae ai ua galo i le talavou lea o lea e sue ia e leoleo, ae ua faigofie ai loa ona maua e leoleo.

E ui e lei vaaitino le komesina poo se isi o le toatolu lea na tulei le latou kololi lea na pue e leoleo, peitai na ia faamautinoa e pau lena o le tamaitiiti lea na taofia mai e leoleo, o le alii o loo iai le warrant of arrest a le faamasinoga, mo le solitulafono o le talepe fale.