O le mea sa’o lava e lei mafaufauina ma e lei tapena Aukilani i timuga mamafa ma lologa na iai i le faaiuga o le vaiaso.
Ta’ua e le Palemia Chris Hipkins e le o iloa i le taimi nei le aofaiga mautu o tagata Aukilani ua aafia ona o lologa e mafua mai i timuga mamafa atoa ma meatotino ua faaleagaina.
A o faia ai galuega laveai ma ofo atu le fesoasoani i tagata aafia, ua saunoa manino le sui palema Carmel Sepuloni ananafi o loo iai le fesoasoani mo le itu tau meaai, o lavalava, fesoasoani mo tagata ua le mafai ona vave foi i galuega, faapea fale mo i latou e le o iai ni fale e faamautu ai.
Ta’ua e Sepuloni o ia foi o le minisita o le matagaluega o loo sau ai fesoasoani mo auaunaga lautele, e latalata i le 1,200 tagata na valaau atu i le Work and Income i le Aso Toonai mo se fesoasoani ma na faaauau mai foi ananafi.
O le faamuamua a le malo o loo ave lea i le saogalemu o tagata Aukilani aemaise o mea o moomia vave.
E oo mai i le taimi na tuufaatasia ai tala fou e toafā tagata maliliu ua faamaonia mai ua ma’umau soifua ona o lologa i Aukilani.
