E ono lē mafai ona vave foi mai i Niu Sila alii Kiwi e toalua lea o loo tuuaia i le faaoolima i le leoleo Thailand.
I lipoti mai Thai, o Hamish Day 36 tausaga ma Oscar Day, 38 tausaga o se auuso sa o i pasika i le Aso Toonai ma e lei tutū ina ua taofi e le leoleo ona o le saoasaoa faapea ai ma le lē usitaia o le itu auala e o ai.
Na lipotia e le Bangkok Post, o le taimi lava na tutū ai pasika a alii Kiwi na amata felafoa’i ai loa faamatalaga ma le leoleo ae o loo faaaogāina foi e le leoleo lana telefoni i le taimi lava lea e tapu’e ai ata.
O finauga nei na iu ina osofai ai e alii Kiwi le leoleo Thai ma taumafai e se’i ese le telefoni faapea ai ma le laau malosi, lea e faapea e faatasi ona pa ma e lei lavea ai se isi.
O lea ua taofia e leoleo alii Kiwi ma molia i le tele o moliaga e aofia ai le gaoi ma faalavelave i galuega a leoleo.
Ae fai mai le faatonu o le Law Aid International, e ono umi se taimi e taofia ai e Thai alii Kiwi ua molia nei ma afai foi ae tuli faasalaga i le toese e ono faafalepuipui ai lava i Thai.
O loo fesootai le matagaluega o le va i fafo a Niu Sila ma aiga o alii e toalua nei ua molia, peitai e lē mafai e le matagaluega ona faalavelave i tulafono a isi atunuu ma ona taualumaga.
