O le su’eina o tusi e iloa ai le faaaogāina o tupe ma isi aseta a le malo sa faagaioi ai nisi o atina’e tetele a le atunuu i le 40 tausaga ua mavae, e lē o se galuega faigofie.
Peita’i e ui i le tuai o ia su’esu’ega le forensic audit ona o se tasi o to’a sa feagai ma i latou sa faia le su’esu’ega o le lē maua o nisi o faamaumauga, ae o lea ua mae’a ma ua tauaaoina nei e le minisita o tupe o le malo tausi, le lipoti o lea su’esu’ega.
Ua faailoa e le Minisita o Tupe le afioga Lautimuia Afoa Uelese Vaai, o loo tapena nei se pepa mo le tuuina atu o le lipoti i le Kapeneta mo sana iloiloga.
E 20 galuega tetele a le malo sa fuafua e aofia i le su’ega o tusi peita’i na faaitiitia i le 13 atina’e sa aga’i iai ia su’esu’ega, e pei ona sa aofia ai le fausia o le falepuipui fou i Vaiaata, le fausia o le malaevaalele i Tiavea, le fausia o le uafu i Satitoa ma le galuega sa tapena ai le faia o le National ID poo le pepa e iloagofie ai le tagata.
E tasi le miliona tala na faaalu ai e le malo mo le su’eina o tusi e pei ona sa faatino e se kamupani su’etusi i Niu Sila.
Se faatalanoaga ma le Minisita o Tupe o le malo tausi le afioga Lautimuia Afoa Uelese Vaai.
