O vevesi a le malo o Isaraelu ma nisi o malo i Sasa’e Tutotonu e pei o osofa’iga a le fitafita a lea malo talu ai nei i le atunuu o Iran, ua mafai ona tuua ai eleele o Isaraelu e le tama’ita’i o Polino Falevaai sa faatasi atu i se a’oa’oga e 10 masina i tomai tau su’esu’ega o faato’aga.
O ia o se tasi o tagata faigaluega i le nofoaga tutotonu o su’esu’ega faasaienisi a Samoa le SROS.
Faaalia i se pepa o faamatalaga mai le Matāgaluega o Fefaataua’iga ma le Va i Fafo a lo tatou malo, e faafetaia le fesoasoani a ofisa o Komesina Maualuga o malo o Niu Sila ma Ausetalia, sa mafai ona aofia ai le tama’ita’i o Polino i aumalaga a tagatānuu o ia malo sa faapena ona tuua Isaraelu i se tulaga faanatinati ona o puipuiga mai vevesi a lea malo ma Iran lea ua taofia i le taimi nei.
O le Aso Toonai na te’a nei na taunuu manuia ai i Samoa lea alo o le atunuu.
