E lē o toe fia foi i se aoga talu mai ona fasi e isi teineiti aoga ma faamanu’alia ai lona ao.
E 13 tausaga le matua o le tamaitai aoga e aoga i le Pakuranga College na fasi e nisi o tamaitai aoga lava o lea aoga, ma e faapea o loo maua i se ata video na pue, e toalua na fasia a o isi o loo matamata atu iai.
Na lipotia e le Stuff molimau a le aiga o lea tamaitai aoga na faamanu’alia, na iu ai lava ina ave i le falemai i Middlemore ona o manu’aga i lona ao ma talu mai le aso 20 o Oketopa na tupu ai, e lē o toe fia foi i se aoga.
O le faanoanoaga o le aiga, o lea lava na muai faailoa e lē ua faamanu’alia i le sui puleaoga, le popole i lona saogalemu ona e iai nisi o loo fuafua e fasi ia peitai e foliga e lei lava puipuiga a le aoga, auā o lea lava na tupu i le aso lava lea.
Ua lipotia ai le lē fiafia tele o le aiga i le aoga, ma e ui foi ua salalau i tua le mea ua tupu ae o loo tumau pea le talitonuga o le puleaoga e leai se bully i le kolisi i Pakuranga.
O lea ua ave e le aiga le mataupu i leoleo, mulimuli ai tutuli uma teineiti aoga e toalua na faia lenei gaioiga matagā.
