O le asō le aso aloaia o le tusigaigoa a Niu Sila, ma e ui ua ausia le tasi miliona o pepa ua uma ona faatumu e le o maofa ai le ofisa.
O lea ua faamaonia mai e le ofisa o tusigaigoa ua ausia le tasi miliona o pepa ua uma ona faatumu e oo mai i le amataga o le vaiaso, peitai e maualuga le fuainumera sa faamoemoe e ausia.
Ua faamautinoa mai ai foi o lea o loo toe tuliloa e le aufaigaluega aiga e le i faatumuina a latou pepa, ma o loo fautuaina foi le fesootai atu i le ofisa pe a moomia se fesoasoani.
O le luitau tele o le tusigaigoa o le 2023 o le afa sa iai nei, e pei ona ua iai nei nisi o fale ua faaleagaina poo le leai lava foi o se pusameli ona ua ave e le afa.
Ona o lea ua malie ai le malo e faaopoopo le isi valu vaiaso e ao mai ai faamatalaga mai aiga ma pitonuu na matuai faaleagaina e Gabrielle.
O le isi lapataiga ua sau ai foi ao faia le tusigaigoa, o le mataalia i websites ma social media accounts taufaasese faafoliga e mo le tusigaigoa.
Ua toe faamanatu ai le ofisa o tusigaigoa latou te le i lafoina mai ni feau i luga o le social media, ma aua nei faasoaina iai faamatalaga faatatau i lou aiga.
Ae mo i latou e uma le asō e le i faatumuina a latou pepa faatumu pe faia foi online, o le a tuliloa e sui o le ofisa.
