Ua toe faamanatu mai e le Palemia filifilia o Niu Sila, Christopher Luxon e le lagolagoina e le National le toe iloilo o le Treaty of Waitangi.
O lea ua toe lua aso maua le faaiuga aloaia o le faigāpalota tele a Niu Sila, ma e foliga mai ai o le faaiuga o le vaiaso o se taimi pisi tele i talanoaga o faiga faapaaga i le va o pati o le a osia le isi faigamalo, e fua i le faaiuga aloaia.
Ma a o lē tele ai se tala mai le Palemia filifilia ia Luxon i faigapaaga o loo faasolo pea nei ma le ACT faapea le NZ First, ua toe faamanino mai e lē o se mataupu o iai se mafaufau o le National le toe iloilo o le Treaty of Waitangi.
A o lei faia le palota tele o lea lava na saunoa le taitai o le ACT David Seymour, e iai lona manaoga e toe faatalanoa le Treaty lenei, peitai a fua i le tele o nofoa o loo seei mai ai le National i lenei paeaiga, e ono leai se avanoa e ono sao mai ai le manaoga o Seymour.
O le a se’i tālia le Aso Faraile ma le iuga aloaia o le palota tele a Niu Sila, pe faamata e faamalieina le manaoga o le Palemia filifilia o loo manao pea e na o le ACT la te faipaaga, ae a leai o lona uiga ua maua le avanoa o Winston Peters.
