Ua tauia le tele o tupe a le vaega o falepuipui na faaalu e saili mai ai nisi ona tagata galulue, peitai e le o lava.
E lata i le $4 miliona lea na alu i faasalalauga na faia i le tausaga talu ai e sailia mai ai nisi leoleo mo toese, lea e le gata i faasalalauga na faaalu i luga o televise, online, social media, o laupapa o loo lomia ai faasalalauga faapisinisi, fale faatali pasi faapea le tele o pepa lolomi na faapipii i luga o le auala.
Mai nei faalauiloa ua maua ai le silia ma le 3,000 o tusi talosaga mai tagata o loo fia galulue e avea ma leoleo i toese, ma o le fuainumera lea talu mai Oketopa o le 2022.
A o fiafia ai le matagaluega o falepuipui i le toatele ua faatalosaga mai e fia faigaluega, ae na ta’ua e le peresetene o le asosi o falepuipui, Floyd du Plessis i tala a le 1News, e le o manuia faalauiloa ona e le o lava leoleo fou o loo auina atu i tua.
Ua fai mai ai foi ma le peresetene o le itu tāua lava e fia omai ai tagata o le lelei o totogi, ma o le mea sa’o e le o lava totogi o leoleo nei e galulue i totonu o falepuipui pe a faatusa i le galuega o loo latou faia.
