Ua sili ma le 10 tausaga le polokalame a le Malo e auina atu ai o tatou tagata e togafiti i atunuu i fafo ona ua lē mafai ona togafitia i Samoa nei.

E ui i le 5 miliona tala na faamatuu atu e le Malo i lana tala faatatau autu o le tupe e faatino ai le aveina o gasegase i fafo na faaalia e Valasi e lē o lava lea seleni.

Na faaalia e le Minisita o le soifua maloloina ua toe faaopoopo atu e le malo le isi 5 miliona tala i le taimi nei a o lei mae’a le tausaga faaletupe lenei ona o le faatuputupulaia lava o gasegase e ave i fafo.

Ua ia ta’ua foi e tatau i le malo ona faamatuu atu se isi $50 miliona e faatupe ai lea polokalame ona ua lē o lava le faasoa a le Matagaluega.

Saunoa le Minisita ia tatou tala o loo agai pea i luga le numera o gasegase ma e i le va o le 200 i le 300 le aofai o gasegase na auina atu mo togafitiga i le tausaga na mavae nei.

O le polokalame na amata mai i le tausaga e 2005, o le auga e mo gasegase ua lē mafai ona togafiti i Samoa nei, aemaise i gasegase e moomia ona fai taotoga, ma o loo aofia i lalo o aiaiga o le polokalame mo le auina atu i Niu Sila mo togafitiga.

Saunoa le Minisita o gasegase o loo ave ai le faamuamua a le polokalame o gasegase o le fatu ma le kanesa.