Ua faailoa mai e le Ofisa Sili o Pulega o le Soifua maloloina le Susuga Aiono Alec Ekeroma i le afiafi ananafi e le o iai se tasi ua faamaonia ua aafia i le faamai o le misela i Samoa i le taimi nei.
Na fesiligia Aiono ina ua maua tala mai se molimau maumaututu sa iai i le falemai i le po o le Aso Toona’i e faapea sa faailoa ane se faasilasilaga i le falemai o tamaiti e tausima’i ina ia faasa ona toe agai i fafo nisi mai lea falemai ona ua iai nisi ua aafia i le misela.
Ina ua talanoa atu ia Aiono na ia faailoa ai sa fesiligia foi o ia e nisi o ofisa faasalalau i le mataupu peitai e leai se tulaga faapea o iai i le taimi nei, ma e tatau ona faasa’o ia faamatalaga ona e faatupu ai le popole i le lautele o le atunuu.
O le vaiaso ua mavae lea na faailoa ai e Aiono ia tatou tala ua amata le campaign a le Matagaluega o le Soifua Maloloina i aoga ina ia faia tui o tamaiti ma i latou e lei tui i le tui o le Misela, ua mafua ia tulaga ona o lea ua iai tagata ua aafia i Niu Sila ma Ausetalia i le taimi nei ma e le nofoa’i le Matagaluega i lea tulaga.
Ua faailoa foi o le tui muamua o le Misela ua silia i le 80% o le atunuu ua mae’a, ae o le tui lona lua e silia i le 40% ua mae’a faia tui, ma o loo fuafua le Matagaluega ia oo atu ia Iuni o le tausaga nei ua i le 90% ua mae’a tui muamua ae 80% le tui lona lua.
