E lē o fiafia tagata North Shore i le tala ua sau o loo manao le pulenuu o Aukilani e tuu i lalo le North Harbour Stadium.
O le fono i le masina o Aokuso na fofola mai ai e le pulenuu ia Wayne Brown i luma o councillors e ono tuu i lalo lea malaetaalo i le tausaga fou ona e lē o iai nisi e faaaogāina.
E 25,000 le tele o nofoa o le malaetaalo lenei na tatala i le 1997 ma o lea na faatupe ma fausia e tagata North Shore mo tagata North Shore, mulimuli ai sau i lalo o pulega a le Auckland Council faapea ai ma lona faatupeina.
E lē o logomalie i tagata North Shore le manao o le pulenuu, ma e faapea foi le finagalo o le pule sili o le Harbour Sport, o Mike Bishop ma le faipule ia Erica Stanford.
O loo ioeina e tagata North Shore e moni e lē o toatele o toe faaaogāina i le taimi nei pe a faatusa i taimi na faatoa faia mai ai.
Ae i le pulenuu, o lea lava o loo faasolo lana le vaai i itu uma e faatumu ai le ava o le paketi a le Auckland Council, lea e faitau miliona.
