E ui i le ‘aitaumalele o alo ma tamafanau o le afioga o Levi Saleimoa i atunuu i fafo, ae o loo susue lava lo latou faamalama ma tilotilo i le faasinomaga ma le tupuaga na ola ma soifua ma fofoa a’e ai o latou olaga ae lei malaga mai i atunuu i fafo.
O le upu masani e masani ona gagana ai le atunuu a tu’ia se vaega o lou tino e logo atoa ai lou itu tino.
O lagona ia o loo lagona e alo ma fanau o Levi Saleimoa o loo aumau i atunuu i fafo ina ua faalogo atu ise mataupu ma’ale’ale o loo tulai mai i fanua o le latou afioaga i Saleimoa ma le afioaga o Afega.
Na ta’ua e se tasi o tama o le nuu o Levi o loo aumau i atunuu i fafo, le susuga ia Tuaiaiga Tuanaimatia Taulamanu Filipo Futialo e faapea e lē māmā i tamafanau a Levi Saleimoa o loo nonofo i fafo lenei mataupu o lea lava o lea oo mai le Kerisimasi e le o nofo lelei mai le mataupu i se tulaga lelei e tatau ona iai, ma o le a avea le Kerisimasi o se Kerisimasi faanoanoa i aiga o le latou nuu.
O le Aso Faraile lea na faapea e oo atu ai le asiasiga a le peresetene ma le ofisa o le faamasinoga i le nuu o Saleimoa se’i asia uta i le eleele i fanua o Levi lea ua faaleagaina e Maulolo ma lana aufaigaluega, peitai ua maua le tala ua toe tolo atu i le Aso Lua o le vaiaso fou o le a faatunuuina ai lea feiloaiga.
O le talitonuga o alo ma fanau o Levi Saleimoa i fafo, e tatau lava ona agai i le faamasinoga e maua ai le tali o le mataupu.
O lagona tiga o le afioaga o Levi ona ua iai vaega ua faaleaga e Maulolo ma lana aufaigaluega e pei o eleeele ua sua faapoloka, o le paipa na fausia e le faigamalo a Tuilaepa ma le HRPP ua faaleagaina faapea foi i auala.
Ua oo lava i pa puaa ma vaega o loo iai meatoto ua sua uma i luga ae molimoli atu na o le tai $100 i tagata e faatau ai meaai a tamaiti.
Talatala le susuga ia Tuaiaiga e faapea o loo malamalama lelei nisi o tuaa matutua o le latou nuu i fanua o Levi o loo vevesi ai nei ma Maulolo, ma o loo latou iloa lelei faamaumauga mai le amataina o lenei mataupu aemaise o le tausaga 1963 na iai lenei mataupu lea ua toe lalaga mai i luga.
O le taimi nei o lea ua taofi galuega o loo faatinoina ona o lea ua i totonu le apili a le afioaga.
Ae o loo iai le naunautaiga a le susuga ia Tuaiaiga e fia feiloai ma tagata matutua o le latou nuu o i latou na soifua latalata mai i le tausaga 1963, o latou tonu ia o loo telē lo latou silafia i lenei mataupu ma o latou foi ia o loo iai le tali o lenei mataupu, faapea tamafanau uma a Levi o loo i atunuu i fafo se’i faaali finagalo e fale ai le matupu ua tulai mai.
O le tagata ma lona faasinomaga o le tagata foi ma lona tupuaga.
