O le saunoaga lea a le Tamaitai Palemia o Samoa, ia Fiame Naomi Mataafa i le Palemene ina ua faailoa le faamatagaluegaina o le MPE e avea ma faamalu o Faalapotopotoga uma a le Malo.
Na faailoa e Fiame e lua lava vaega o loo auala atu ai le auaunaga a le malo i ona tiute fai mo le atunuu, o le PSC lea o loo iai i lalo Matagaluega uma a le malo atoa ai ma le MPE mo Faalapotopotoga Tuma’oti.
Na faavae le MPE i le tausaga 2015 o le faamoemoe sa iai ia faisao atu i le faatupulaia o le tamaoaiga o le atunuu e ala lea i nisi metotia i pulega ma le tagai lelei i matafaioi a faalapotopotoga.
Na ta’ua e le Tamaitai Palemia o le fesuiaiga e lē taugofie ae o loo iai le manaoga mo nei faamalu e lua e faatonutonu lelei ai a la auaunaga i le tulaga maualuga e talafeagai ma ia avea ma ala’oa na te tuuina mai tupe faasili mo tala o le tupe faasoasoa i lea tausaga i lea tausaga.
Saunoa le Tamaitai Palemia e lē fou le tulai mai ae o se tasi o vaega ua tele foi tupe a lo tatou malo sa sasaa atu iai i tausaga ua mavae.
