Ua faailoa e le Alii Komesina o Leoleo, Tofa Auapaau Logoitino Filipo e faapea e le fou le laisene e faatau ai laau malosi ma ututau a le Alii Minisita o Faatoaga ma Faigafaiva e pei ona fesiligia nei.
O le vaitaimi o tulai mai Lilomaiava Fou Taioalo ma Komesina o le Matagaluega na faatino ai le laisene lea ma tuuina atu ai le faatagaga e faatau ai laau malosi ma ututau o se pisinisi a le Afioga ia Laaulialemalietoa Leuatea Polataivao Fosi Schmidt.
Sa faailoa foi e Auapaau sa fai lava ma faafou le laisene ae na iai taimi na le toe faafouina ai ma taatia ai loa.
O le 2021 na toe oo atu ai Laauli e toe totogi le faafouga o le laisene ma ave loa iai le fautuaga a le Matagluega e tatau ona sue se isi e liliu iai le laisene ona o lea ua iai ona tofi faalemalo. Sa faatino lea tulaga ina ua tusi atu le Alii Minisita ma liliu ai loa i lona atalii lea o loo ua iai nei.
Na faatonuina loa ia fai atu le laisene Pisinisi ma ana le faamalieina lava lea tulaga e le agai loa leoleo e faatino le faagasologa i lalo o le Tulafono tau auupega le Arms Ordinance a le Matagaluega o leoleo e ala lea i le faatonu ai ia mautinoa e malupuipuia le storage area, (vault) e teuina ai laau malosi ma ututau, ia mautinoa e iai ni meapueata i totonu o lea nofoaga.
Na pasia loa lea tulaga agai loa leoleo e faatino aoaoga a le alo o le alii minisita i tulaga tau saogalemu o le tauaaoina o auupega poo le gun safety.
Na faamalieina uma ia tulaga e tusa ma le Tulafono ona tuuina atu lea o le pemita e mafai ai e le atalii ona auina mai laau malosi ma ututau mo lana pisinisi.
Saunoa le Komesina na pau laau malosi o loo faataga ona auina mai ma faatau atu i le atunuu ua na o le ituaiga o le 12 ma le pulutasi.
Na pau foi lea o laaumalosi e faataga ona resitara faatulafono. Na taua e le Komesina o le oka lea na aumai e le alo o le Minisita, ua faataga ona ua talafeagai, ma ua tusa ai ma ala o le Tulafono.
Ua faailoa e Auapaau o lona talitonuga e ese foi ala o galuega ma faatinoga a le ofisa o tiute e tusa ma a latou foi Tulafono, ae o le matagaluega lava ia o leoleo ua faamalieina ana Tulafono e tusa ai ma laaumalosi sa auina mai.
Na ia ta’ua foi e leai ni auupega faasolitulafono na aumai ai. Ua faapea mai foi le alii Komesina e ao ona silafia e le atunuu o loo iai foi isi pisinisi ua latou faatauina foi i le taimi nei auupega ma ututau ia o loo faataga i lalo o le Tulafono a leoleo.
O le taimi nei e lima ai i le alo o Laauli pisinisi o loo ua faatulafonoina i totonu o Samoa e faataga ona latou faatauina atu laau malosi ma ututau i le atunuu ma seiloga foi ua tuuina mai le pemita i le tagata faatau e faatau ai ia oloa ona faatoa faataga lea i aiaiga o loo iai se laau malosi ma ua maea laiseneina.
