E le o iai se finagalo o le sui faipule o Lepa ma Faleata 3 e faamavae ma tofi faipule o o la itumalo, ona o le faasalaga ua toe faaauau ai le tuueseina o i laua ma galuega faafaipule o le Fono Aoao Faitulafono a Samoa mo le 24 masina.
O le feiloaiga a le susuga Tuilaepa L Sailele Malielegaoi ma le tofa Lealailepule Rimoni Aiafi ma nisi o tusitala i le Aso Lulu ina ua tuanai le Aso Lua na talia ai e le Palemene le lipoti a le Komiti o tulaga aloaia ma amio taualoa ua toe faamalolo le tumau ai, na faailoa ai se finagalo o le taitai o le itu agai ma ia saunoa, e leai se mea sese ua la faia e mafua ai ona faamavae mai o la tofi faipule.
Na faailoa foi e Tuilaepa i lea fono ma tusitala, e ono toe asia le tulafono i se isi gaioiga e toe lu’i ai le faaiuga i le faamasinoga.
O le faasalaga lua tausaga ua tuueseina ai ni sui faipule o ni itumalo mo le umi e 24 masina, o se faasalaga pito umi lea ua faamauina i talafaasolopito o paeaiga faapalemene a Samoa talu ona tutoatasi.
O le faasalaga pito umi sa iai o le 12 masina na faamalolo le tumau ai le sa avea ma faipule o Anoamaa i Sisifo le afioga Leota Leuluaialii Ituau Ale, i le paeaiga faapalemene o le tausaga e 1988 i le 1991.
O loo pito atu iai le faasalaga 4 masina na faamalolo le tumau ai e le komiti o tulaga aloaia ma amio taualoa le sui faipule o Satupaitea le tofa Asiata Saleimoa Vaai, i le paeaiga faapalemene o le tausaga e 2006 i le 2011.
