E iai le eseesega o le saini masani a le afioga Patu Tiavaasu’e Falefatu Maka Sapolu ua tuumalo, ma lana saini i pepa o lana uili o loo ogatotonu iai suesuega a le Faamasinoga Sili, i le tagi a lona faletua le afioga Iliganoa Daphne Sapolu, lea o loo tuuaia ai le tuafafine o lē e ana le uili, i lona faia o tapenaga o le uili i se auala solitulafono na faamalosi ai ona tuu le saini i pepa o le uili.
O le mau lea a se tamaitai poto faapitoa mai Niu Sila sa tulai i le Aso Lua mo lana molimau na ia faamatala ai le eseesega e mafai ona iloa i le vaitusi o le peni.
Na faaalia e le molimau o le mataitusi o le “F” i le saini masani e iai le eseesega i le saini i le pepa o le uili ma o lona talitonuga i sailiiliga o ia vaega, e le o le saini masani lea.
O loo iai le finauga a loia a itu o loo faasaga iai tuuaiga e ono mafai ona tupu se eseesega faapea ona o le taimi na saini ai pepa e lē e ana le uili, o loo malomaloā ona tiga i lona gasegase.
I le molimau a se tasi o tamaitai faigaluega mo le itu tagi sa ia faailoa i le faamasinoga, o ia le isi sa avatu iai e le tuafafine o lē e ana le uili pepa e saini ai o se tasi o molimau. Peitai na ia faato’a faailoa i lē ua tagi lana saini ina ua ia mau tala i le ave o le mataupu i le faamasinoga.
O se ogatotonu o lenei vaiaso o le a faamae’a ai molimau uma o lenei faamasinoga, lea o le a tutulai ai molimau e teena tuuaiga uma ua folasia e le itu tagi, aemaise o le molimau a le afioga Luamanuvao Katalaina Sapolu, o le tuafafine a lē e ana le uili lea o loo tuuaia i mau tusitusia a le itu tagi.
