E fā itumalo ua faamautu mai ua pasia e le Komiti Faafoe ina ua mae’a iloiloga a le Matagaluega o Tina ma Tamaitai ua mautinoa ua agavaa i le $425,000 mulimui o a latou tai tasi miliona o Poloketi.
O itumalo nei e aofia ai Falealupo, Faasaleleaga 4, Palauli 2, ma Gagaemauga 2.
Ua faailoa ua mae’a tuuina atu i totonu lipoti o le faaaogaina o le $425,000 muamua, ma ua mae’a pasia e le Komiti Faafoe ia lipoti ma agavaa ai nei mo le vaega mulimuli o le tasi miliona.
O le asō foi lea sa faamatuu atu ai e le Malo le tai $150,000 i itumalo e tolu ua mae’a tuuina atu lipoti ma tala o tupe mo le faaaogaina o le $200,000 sa tuuina atu mo le fausia o ofisa o itumalo.
O le $150,000 tusa lea ma le 15% o le miliona e faamatuu atu mo le faagaioina o ofisa o itumalo e pei o totogi o le aufaigaluega, pili o telefoni, o le vai ma isi itu manaomia e ofisa o itumalo.
O Itumalo ua tauaao atu iai lea vaega tupe e aofia ai Gagaifomauga 1, Faasaleleaga 1, ma Aana Alofi 4.
O Gagaifomauga 1 ma Faasaleleaga 1, ua mae’a iloiloina e le Matagaluega ma ua pasia e le Komiti a latou taiala (District Development Plan) ma ua lautogia ai nei i le $425,000 muamua (First Tranche) pe a mae’a faatalanoaga a komiti o itumalo ma le komiti galulue a le Poloketi.
