O le lima afe tala na ave e le vaega faaupufai o le Faatuatua i le Atua Samoa ua Tasi i faaaloaloga i le latou faalauiloa a o lei faia le palota laititi a Vaimauga 3, na faatoa tufa ina ua mae’a le palota laititi.

O molimau ia a nisi o tagata palota ua talia e le faamasinoga a o suesueina le tagi tau palota ua faaleaogaina moliaga na faaulu e le itu tagi, faapea foi ona faalēaogā moliaga a le itu na faasaga iai tuua’iga.

I le faatoa maua o se kopi o le faaiuga tusitusia, ua faailoa ai e le faamasinoga i lana faaiuga na lau i le Aso Faraile ua mavae, o le lima afe na ave i le sui o le komiti a tina o le nuu o Magiagi ma sa tufa i le itumalo ma i latou uma sa iai i le aso na faia ai le faasoa.

O iloiloga a le faamasinoga i le tuuaiga o le lima afe ua ta’ua ai e le o se tupe maoa’e pe a fua i le faaaloalo a le nuu ma le itumalo e le gata o teutusi o meaalofa tupe na ave i le taitai ma sui o le vaega faaupufai e ana le faalauiloa, ae o le ‘ava oso sa tapena e le nuu ma le itumalo.

I le amatamea o le itumalo ma le afioaga o Magiagi i faaaloaloga, ma tali le Faatuatua i le Atua Samoa ua Tasi i lana faaaloalo e lima afe tala, ua faaalia i le faaiuga o se tu ma se aga masani, faasamoa auā a lē faia, o mata o maasiasi i le va nonofo ai o fesagaiga i le ava fatafatafa i le aganuu faasamoa. 

I le tuuaiga o le limaselau tala na ave e se sui o le vaega e puipuia aiātatau a tagata i le savali a nisi o le afioaga o Matautu i Apia i le aso na momoli atu ai lo latou sui tauva, ma faaupu o le pasese, ua faaalia e le faamasinoga o palota i lana faaiuga o se tasi o tu masani.

E lagolagoina ai e le faaiuga le molimau a se tasi o tagata palota sa lagolago i le teena o le tuuaiga mai le itu na molia, e le nonofo nonofo se nuu tulai ma momoli se sui tauva i se vaega faaupufai ua iai le latou lagolago e tauva ai, ma o se faaaloalo e tapena iai lena pati, o se tu ma se aga masani, ae le o se faatosina mo ni tagata palota.

Ua ioe foi le faamasinoga i lana faaiuga o taumafa ma faguvai na tufa mo le savali a le afioaga o Matautu i Apia i le aso na momoli ai lo latou sui faatu, o se tapenaga ua masani ai le atunuu.