Ua le na o le vaaia ma puipui le saogalemu o fanau e sauaina o loo ofoina ai le auaunaga a le faalapotopotoga o le Toomaga mo ē Puapuagatia, ae e iai foi isi tautua o loo ia faatino e pei o polokalame e pulea lelei ai le loto ita, ma le tasi o polokalame tāua o le tuuina atu o fautuaga i mātua i auala talafeagai ma le soifuaga i totonu o aiga Samoa, e aoa’i ai fanauiti, ae le o le fasi pe faia iai nisi gaioiga e aafia ai i le Tulafono.
O le Aso Faraile le faaiuga o lenei vaiaso ua faatino ai se tasi o a’oa’oga faapea o le a auai mātua e toa fitusefulu mai afioága o Samalae’ulu i Savaii, ma afioga o Fasitoo uta, Toamua, Siumu, Fagalii, Luatuanuu, ma Solosolo i Upolu.
O le aoaoga e faia i le nofoaga mo fonotaga ma faatasiga tetele i le maota o Tuiatua Tupua Tamasese Efi i Sogi, ma le naunautaiga o le Toomaga ia mafai ona auai ma nisi mātua e latou te molimauina le tāua o auala ua tapenaina e fesoasoani ia i latou i le aoa’iina o o latou alo ma fanau.
Faaalia e le Peresetene o le faalapotopotoga o le Toomaga mo ē Puapuagatia le faletua o Siliniu Lina Chang, e leai se faamoemoe o le polokalame e faatonu mātua e aua le faia lea ae fai le mea lea.
O le autu o le galuega ia faailoa auala e mafai ai ona aoa’i lelei fanau, ina ia fausia ai se sootaga lelei o mātua i o latou alo ma fanau a o itiiti i latou.
O le faalapotopotoga o le UNICEF o se tasi o auaunaga a Malo Aufaatasi e patino i le vaaia ma le puipuia lelei o le ola saogalemu o fanauiti o loo faatupeina lea polokalame.
Ua lua tausaga o faatino e le Toomaga le polokalame ma ua 300 mātua ua oo iai le galuega fesoasoani.
