O se tasi o mafuaaga o le faasee ese o le sui Faipule o Faasaleleaga Numera 5 o Peseta Tevaga Vaifou mai le tofiga o le taitaifono o le Fono Faavae ona o lona tanuina lea o le sami e fausia ai le Ofisa o le Fono Faavae e faaaogā ai se vaega tupe o le $200,000 lea na faamatuu iai e le malo mo le fausiaina o le fale.
O lea vaega ua manatu ai le Minisita o Tina ma Tamaitai ua lē talafeagai ma aiaiga o le poloketi.
Na lipotia e le faletelevise a le TV1 faatalanoaga ma le minisita aemaise o le sui a Faipule.
Faaalia e Mulipola, o isi vaega e aofia ai le fanua o loo fausia ai le ofisa o loo finauina ma oloo taoto i le faamasinoga, e lē gata i lea, talu ai ona o le umi ona to’a le poloketi ua manatu ai nisi o le itumalo ua tatau ona faasee ese le Faipule mai i lona tofiga faataitaifono..
O se faaiuga na saunoa le Faipule, e lē sa’o, aemaise ua toe solomua i le komiti o le poloketi ona toe soli a latou faiga faavae.
Faaalia e Peseta ua mae’a ona toe soalaupule feeseeseaiga na tulai mai i le fanua.
Ta’ua e Peseta e lei taitai ona gafatia i le 200 afe tala le galuega atoa ma o le mafuaaga lea na ala ai ona tatalo i le faletupe a Samoa, mo se nonoga tupe e faamae’a ai le galuega, ma o loo ia togitogia.
O le faanoanoaga tele o le sui Faipule, ua mae’a ona fausia le Ofisa o le Fono Faavae, ae ua lē faaaogāina, ma e manatu, o se isi vaeaga tupe o le poloketi, o le a toe faaaogā mai mo se isi fale fou.
Ua mae’a ona feiloai le Faipule ma nisi o sui o le itumalo ma le Palemia mo se fesoasoani i le mataupu, ona na saunoa Peseta, ua taoto i le agatonu mataupu na faalavelavea ai le poloketi.
