O Samoa o le atunuu lona lua lea mai le Pasefika ua ofi i totonu o lenei faalapotopotoga o loo iai le silia ma le 180 atunuu o le lalolagi.
O le vaiaso nei na auai aloaia ai Samoa faatasi ai ma nisi atunuu i lenei faalapotopotoga.
O lenei faalapotopotoga o le latou auaunaga o loo iai le tomai faapitoa e faasino lea i tulaga o le saogalemu o le faaaogaina o le upega tafailagi.
Na saunoa ai le Faatonu a le GFCE i le Pasefika, Saia Vaipuna e tusa ai o lenei vaega taua.
“Mo Samoa e avea ai ma sui o lenei vaega, e ao ina tusia se tusi e apalai aemaise se faamaoniga tusitusia e faamaonia mai e se tasi o iai se tofiga maualuga i totonu o le Malo o Samoa.
“O nisi o gaioiga a mae’a ona tauaaoina lenei tusi apalai ona circulate lea i sui a le GFCE mo le 10 aso.”
Na saunoa le Faatonu, o le tausaga ua mavae ia Novema lea na asiasi mai ai i Samoa nei ma o le tausaga foi lea faatoa faavae mai ai le vaega a le Samoa Computer Response Team poo le SamCert lea o loo gafa ma mataupu tau i le puipuiga i luga o upega tafailagi.
“O le malaga mai i le tausaga ua mavae o i lea na amata ai ona process le auai ai o Samoa i lenei faalapotopotoga, o le auai ai foi i le GFCE e lē manaomia se sainia o se maliega, poo se totogi foi e avea ai ma sui.
“O le naunautaiga a lenei faalapotopotoga ia mafai ona auai Samoa i soo se polokalame e faatautaia e mataituina ai nisi o mataupu ma faafitauli o loo agiagia nei i le lalolagi e pei o le taufaamata’u i luga o upega tafailagi ma isi.
“Aemaise ai foi nisi o vaega e fia aumai e Samoa ina ia faaleleia ai le auaunaga.
“O le avanoa tāua foi lea e mafai ai ona maua le avanoa e fefaasoaa’i ai ma nisi o sui o loo gafa ma filifiliga fai ma faalapotopotoga e galulue faatasi e faafoia faafitauli tau upega tafailagi.”
O le atunuu o Papua Niu Kini sa taimua i le avea ai ma sui o lenei faalapotopotoga ma e iai le faamoemoe e auai sui uma mai le Pasefika.
