O se tina ma o se alo tamaitai o Samoa sa tautua i le atunuu i le tomai faaloia ma le tofiga faamasino o le Faamasinoga Faaitumalo ma le Faamasinoga Maualuga, ua avea nei ma uluai tausala o le Pasefika ua faaee iai le tofiga Polofesa o le Tulafono poo le Professor of Law.
O le afioga Tafaoimalo Leilani Tuala Warren ua faamavae ma le tofiga faamasino ma ua faamautu i Niu Sila ma lona aiga, ae o le tele o lona olaga galue o le tatou atunuu.
Ua faailoa i se pepa o faasalalauga faalauaitele mai le Iunivesite o Waikato na faia lea filifiliga o se pine faamau lea filifiliga mo tamaitai o le Pasefika ua ausia se tulaga maualuga i tautua ma tomai tau tulafono.
O le tasi o pine faamau o lea tofiga o le filifilia foi o se tamaitai Fiti e avea ma faiaoga o le tulafono i lea iunivesite.
