O le 19 tausaga o Irae John Tanuvasa na uluai faaali ai ata na ia tusia i le faaliga a le Life-Con Pacific i le tausaga 2020 ma ua toe maua lona avanoa i le faaaliga o lenei tausaga.
O le talaaga o le olaga tusiata a Tanuvasa na ia ta’ua o lana tusiata ua na o se mea e nofonofo i ona taimi paganoa i le fale ma fai.
“A iai o’u taimi avanoa i lo matou fale ona ou nofo lea ma tusi a’u ata o aso uma lava e pei o se masani ia te au.
“Ou te lei aoga i se aoga tusiata o le taimi nei o loo ave la’u Bachelor of Science i lona tausaga tolu.
“Na ou ola mai lava a’u ma lenei taleni o o’u mafaufauga foi e tusi ai se ata e le o se mea e faigata ia te au.
“Ae ou te manao ou te aoga i le itu tau graphics ma animation e pei ona iai lenei vaitau i le faaaogāina o tekonolosi faaneionapo e faaaogā ai le komepiuta e tau le tusia se ata i luga o se pepa.”
O se tasi o galuega a lenei alii na faaalia i le po na tatalaina ai lenei faaaliga o loo momoli mai ai le feau i le puipuia lea o le siosiomaga i le gataifale.
“Ou te taumafai lava i a’u ata o loo tusia ia iai lava se feau o loo ufiufi mai ai e pei o le laumei elei atoa le tusiaina ae o lona patua o loo o’u tusia ai lapisi o loo tele ina lafoai e tatou tagata i le sami.
“O le feau o loo aumai ai, ia aua le faalapisi i le gataifale o loo ola ai foi isi meaola o le sami.
“O nisi o ata o mafaufauga e maua mai i ata tifaga ona ou tago lea e faatusatusa mai i le olaga i Samoa nei.
“I le faaaliga sa ou auai ai o le 2020 e fitu au artpieces sa faalauiloa ai o se tasi o a’u ata na faatauina lea e le Minisita o Aoga a o isi na faatau lava e isi aemaise si o’u aiga.”
O taumafaiga a Tanuvasa ma faamoemoe e faalauiloa ai ana galuega e taumulimuli ai ma lona matua tausi ia Safuneituuga Paaga Neri o se tasi o tina sa tautua i le Malo i le tele o tausaga.
Na ta’ua e le tina o soo se faamoemoe e agai ai lona alo e faalauiloa ai ana galuega e alu ai foi.
‘”E ese ma lo’u lagolago i le taleni a si a’u tama poo fea lava e alu ai e faaali foi ana ata ou te lē taitai o’u misi ai.
“Ou te unaia lava e taumafai e atina’e lana tusiata e fesoasoani foi ia te ia ma lona lumanai.
“E tele nisi o vaega o loo auai ai Irae e masani ona valaau mai le Matagaluega o Aoga e alu atu e illustrate ata o tusi aoga a fanau aoga.
“O le mitamitaga ia te au o lea e laititi ae mafai ona faaaoga lelei le mafaufau auā o soo se matua lava o le faanaunauga lea i fanau ia iloa ona faaaogā tatau le mafaufau, poo ā taleni ua foai iai e le Atua, ia faaaogā ma le tatau.”
O loo lagolago malosi mātua o Tanuvasa aemaise lona aiga atoa i lana taleni tusiata.
O le naunautaiga a lenei alii ia mafai ona fausia sana ia lava pisinisi e faalauiloa ai ma maketi ai ana galuega tusiata.
