I le amatalia ai o tapenaga a le Moana Pasifika mo le taamilosaga o le Super Rugby mo le tausaga 2025, ua faalauiloa mai e le Pulega o le ‘au a le Pasefika le avea o le alii o Ardie Savea ma kapeteni o le ‘autele mo lenei tausaga.  

O le alii o Ardie, e 94 taaloga na taalo ai mo le ‘au malosi a Niu Sila le All Blacks, ma o le tausaga lenei o le a taalo ai le alii 31 tausaga mo le Moana Pasifika.  

Ua faamauina le ofi mai ai o Ardie Savea i le ‘au lea o le a ia avatu ai i totonu o le ‘aulakapi le tele o lona iloa ma le silafia i le taaloga a o le tomai i le faatinoina o le taaloga, lea ua silia ma le 10 tausaga o ia auai ai.

I se pepa o faamatalaga mai le pulega o le ‘au, na ta’ua ai e le alii o Ardie Savea, lona mitamitaga i le faaeaea ua avea ai o ia ma kapeteni o le ‘au mo lenei tausaga.

Na faailoa e le alii Samoa, o lona iloa o se meaalofa ma o lona valaauina e mai le Atua.  

O le vaiaso lona lua o lenei masina o le a taalo ai le Moana Pasifika i lana uluai taaloga i le HBF Park i Ausetalia, ma o le a iloilo ai mai le ‘au a le Western Force.  

Mai le faagasologa o taaloga a le ‘au a le Pasefika, e 10 taaloga o le a faatautaia i totonu o Niu Sila ma le 4 taaloga o le a faatino i fafo atu o Niu Sila.  

Puna o Faamatalaga: https://moanapasifika.co.nz/savea-named-moana-pasifika-captain/