Ua tusi atu le taitai o le vaega e puipuia aiātatau a tagata le susuga Tuilaepa L Sailele Malielegaoi, i le Failautusi o le Fono, ma fautuaina le ave o le taavale fou na faatau mo le taitai o le itu agai e toe faatau, a maua ai se tupe ona totogi ai lea o ovataimi poo itula faasili o fomai ma tausi soifua o le matagaluega o le soifua maloloina.
E pei ona silafia o le tala o le tupe o le tausaga faaletupe ua mae’a na faatau ai le taavale, ae sa tu tu i le ofisa o le fono i Mulinuu e lei faaaogaina.
O lea la ua savalia nei le lua vaiaso talu ona faaaoga ma ua fealuai ai le taitai o le Itu agai na filifilia e le Palemene le tofa Lauofo Fonotoe Nuafesili Pierre Lauofo Meredith, ina ua faamalolo lē tumau ai mo le 2 tausaga le susuga Tuilaepa sa avea ma taitai o le Itu agai.
I le tusi a le taitai o le vaega e puipuia aiātatau a tagata o loo momoli i se gagana malosi faigofie ma ia ta’ua ai o le taimi a o tu i le foe lana pati faaupufai i le pulea o le Malo, sa latou amatamea i le faatau o le taavale mo le taitai o le Itu agai i le taimi o le vaega faaupufai o le Tautua Samoa sa avea ma Itu agai.
Peitai o lana matau ua pule le faigamalo a le Faatuatua i le Atua Samoa ua Tasi i le tagata e ave iai le taavale. Ua faamatalaina e Tuilaepa lea tulaga ua pei o ni tamaiti e faalālā atu iai le lole, ona taufetuli atu lea ua taufao.
O le ituaiga tofa lea ua faaalia e Tuilaepa ua oo lava i le taavale ua faatino iai, ma ua lagona ai lona faanoanoa i le ituaiga o taitaiga ua iai le Palemene ma le Malo.
O se tasi o laina o lana tusi e faitauina faapenei, “E le moomia e a’u ma matou o le HRPP o taitai iloga o Samoa ni uiga matagā palapala faapea, e pei tou te tau’ai mai ni lole ona matou laga atu lea iai e taufao ma mitimiti, ma etoeto. Ae pule outou i lē e ave iai e etoetoa. E le o matou o ni tamaiti.”
O loo saini ai le suafa o Tuilaepa i le tusi, o ia o le taitai o le vaega faaupufai e puipuia aiātatau a tagata le HRPP.
