Ua faagasolo nei le vaiaso o talosaga ma anapogi e pei ona sa amata i se sauniga lotu i le maota tatalo o le Faavae i le Atua Samoa i le aso muamua o le masina amata o lenei tausaga fou, lea na faatumulia le sauniga i taitai o le Malo ma ekalesia faapea malo valaaulia.
O se sauniga sa tapenaina e le Fono a Ekalesia Soofaatasi ma laugaina ai le feau o le tatalo anapogi e le taitaifono o le Ekalesaia Faapotopotoga Kerisiano Samoa le susuga Auatama Esera o loo tausia le aulotu EFKS i Sapapalii i Savaii.
Le susuga Auatama Esera i se vaega o lana lauga o le sauniga lotu ua tatala ai le vaiaso o talosaga ma anapogi i Samoa.
Na auai le afioga i le Ao Mamalu o le Malo ma le Sui o le Fono a Sui Tofia faapea taitai o le Malo, Minisita o le Kapeneta o Sui Faipule o le Palemene ma nisi o le aufaigaluega a le Malo sa lagiina viiga o le sauniga.
