Ua alu le uluai malaga o fesoasoani faapea tagata galulue a Niu Sila e fesoasoani ia Vanuatu ma lona mafatia.
Matuai iloga ona tigaina Vanuatu i le uma ai o le afā lona lua i le Aso Toonai, Cyclone Kevin lea e Category 5, e ese ai Judy lea na muamua i Vanuatu ae e Category 4.
O afā nei na matuai lolovaia ai ma faaleagaina le tele o vaega o Vanuatu, ma e faafetaia ai ona e leai se soifua ma’umau e oo mai i le taimi o tala fou.
Na ta’ua e le minisita o le va i fafo a Niu Sila, Nanaia Mahuta, o le taeao ananafi na tuua ai e le vaa a le ami Niu Sila nei mo Vanuatu, ma na ave ai vai faapea le tele o sapalai o mea o moomia vave e tagata Vanuatu.
Na ta’ua ai foi e le minisita e toafitu tagata galulue o le tineimu a Niu Sila, Defence Force faapea sui o le matagaluega o le va i fafo e o i Vanuatu mo galuega fesoasoani.
E ese mai i foai nei, e $150,000 le fesoasoani tupe amata ua tuuina atu i le Hai Komesina o Niu Sila o loo i Vanuatu e faatupe ai talosaga o loo faaoo ane i lona ofisa ona o le afā.
O Vanuatu o loo faatulagaina e Malo Aufaatasi o le atunuu e aupito sili ona lamatia gofie i mala faalenatura.
