O se vaitaimi tāua lenei o le tausaga ona ua sauni foi fanau i suega e saili ai tusipasi ma faailoga e faamauina ai le olaga aoaoina, ae o se faigasu’ega foi o le a iloa ai le taunuuga o seleselega pe o lelei, feololo, poo ua tu i le faaletonu.

O le isi lua vaiaso o lumanai nei ona faia lea o su’ega mo fanau i vasega Tausaga 10, 12 ma le 13.

O tapenaga a faiaoga ma le aufaisu’ega o loo ave ai le faamanatu a le pulega o le matagaluega o aoga taaloga ma aganuu ina ia malamalama i le faatinoina o o latou tiute tauave.

Ua faailoa i auala o fesootaiga a le matagaluega sa faia i le amataga o lenei vaiaso se mafutaga a uluaoga ma faiaoga o le a faia su’ega a le fanau i le autu ia toe faamanatu iai le tāua o le latou pitolaau.

O le isi itu tāua o lea mafutaga ia sologa lelei le faagasologa o su’ega auā e lē ‘asa lava ma ni faafitauli.

Ua toe faamamafa foi i le taimi lenei le faamanatu tāua e le toe faia ni fafaga mo le aufaisu’ega.

O le aso 13 o Novema e amata ai suega faalemalo mo aoga maualuluga uma i le atunuu ma le faamoemoe e mae’a i le aso 23 o le masina nei lava.