E ui ua lē maua se faamanuiaga e totogi sa’o i tagata fai saofaga o le NPF i le tufatufaga a lea faalapotopotoga tau tupe a le Malo, ae o le 6 tesimale 3 pasene ua avea ma faamanuiaga poo le dividend ua tuusa’o uma nei i le saofaga a le tagata ma avanoa ai ona nonō mai ai, pe o le taatia ai mo se isi taimi.
O le taitaifono o le komiti faatonu o le faalapotopotoga o le faaputugatupe o le lumanai manuia o tagata, le Minisita o le NPF ma le tamaitai Ofisa Sili filifilia fou na latou faailoa lea tufatufaga mo tagata fai saofaga, ma faamanino mai ai foi le mafuaaga ua lē maua ai se vaegatupe e tuusa’o i aao o tagata fai saofaga o se meaalofa ae lē o le toe aitalafu ai i le faamanuiaga.
Le Minisita o Tupe o loo iai ma le vaaia o le NPF afioga Mulipola Anarosa Ale-Molioo ma le susuga Papalii Panoa Tavita Moala o le taitaifono o le komiti faatonu o le NPF.
