O le nofoaga o le Tofamamao a le Ekalesia Katoliko i Samoa o loo i Leauvaa na faatino ai se faaaloalo maualuga i le Aso Lulu o lenei vaiaso, e ala i se ‘ava faatupu na tapena ma saunia e le afioga i le Aki Epikopō Alapati Lui Mataeliga o le faaao o le puleaga a Samoa Apia, e faafeiloai ai le Epikopō filifilia fou o le puleaga a Samoa Pago Pago le afioga Kolio Etuale Tumanuvao ma lana aumalaga.
O le afioaga o Leauvaa i le Paia maualuga i le afifio o Tuala ma Salā aemaise o fetalaiga ia Tevaga ma Vaifale na saunia le faaaloalo o le ‘ava faatupu.
O le masina na tea nei na masii ai le faaao o le Puleaga a Samoa Apia ma le paia o le ituaiga Sa i le faauuga o le Epikopō fou ua faauluulu nei iai le puleaga a Samoa Pago Pago poo Amerika Samoa.
O lea faauuga na auai foi le Ao o le Malo ma lana Masiofo faapea le afioga i le tamaitai Palemia.
