Ua toe autalu e le Malo e ala i se iloiloga poo se review le tulaga siitia ua iai nei le aofaiga poo le numera o tagata faigaluega o loo tautuaina le atunuu e ala i matagaluega ma faalapotopotoga eseese a le Malo.

O se mataupu sa faailoa e le Sui Palemia le afioga Tuala Tevaga Iosefo Ponifasio i taualumaga a le Fono Aoao Faitulafono i lenei vaiaso, e mafua i ni finagalo mai saunoaga faalauiatele a faipule i le tala faaopoopo muamua o le tupe lea o loo faatalanoa e le Palemene.

Ua faailoa e le Sui Palemia i le maota fono i Tiafau e tāua le iloiloga o le a toe autalu ai le tulaga o loo faataoto ai faiga faavae a le Malo, ona o le tulaga maualuga o tupe faaalu i totogi o tagata faigaluega a le Malo, ma le silasila mamao lea i le toe fetuutuunai o auala ma faiga e mafai ona faatonutonu lelei ai le sailia o tagata e agavaa i le faatinoina o galuega.

Na lagalagā finagalo o nisi o faipule o le Itu agai ma latou finauina le Malo e faia ni siitaga i totogi o le aufaigaluega ona ua taugata le soifuaga ua iai nei, peitai na faailoa e le Sui Palemia o le tele o ia finagalo na tuuina atu e leai ni mau malolosi e lagolago ai le tatau ona faia o sea tulaga.

O le faigamalo ua tuanai sa latou faataoto se siitaga o totogi mo tagata faigaluega uma a le Malo, sa faia auauai i totonu o le fa tausaga ua tuanai.

O le siitaga mulimuli na faia i le tausaga e 2020 a o lumanai le palota tele a le atunuu i le 2021.