Ua faatonuina e Korea i Saute le aumai i Niu Sila o le tina lea ua tuuaia e tusa ma auivi o fanau na maua i atopau.
O le Aso Faraile o le vaiaso talu ai na ioe ai le faamasinoga maualuga a Korea i Saute e tuuina mai lē ua tuuaia i Niu Sila, peitai o lea sa faatali i le faaiuga mulimuli e faia e le minisita o faamasinoga a lea atunuu, Han Dong-hoon.
O le po anapo na sau ai loa tala o le faaiuga a le minisita, ma o totonu o le 30 aso e tatau ona aumai ai i Niu Sila.
O le ogatotonu o Setema lea na ave faamalosi ai e leoleo Korea i Saute le tina ua tuuaia i lalo o le faatalosaga a leoleo Niu Sila.
O fanau e toalua na maua e se tasi o aiga Aukilani o laua auivi i totonu o atopau e talitonu na maliliu i le 2018 ma o lea na maua mai e le aiga mai le faatau tu’i.
O le faaiuga ua iai nei, ua o se tali lelei lea i le faatalosaga a Niu Sila e pei ona tuuina atu ia Korea i Saute e aumai le ua tuuaia i Niu Sila nei.
