E iai atunuu o loo maua ai le tuipuipui o le faama’i o le fiva ponaivi poo le dengue fever, ae e lē o maua i Samoa.

Ua faailoa lea tulaga e le matagaluega o le soifua maloloina i lana faasalalauga faalauaitele ua faailoa ai fautuaga mo tagata malaga uma e ulufale mai i le atunuu, ona o le pepesi ai o le gasegase o le fiva o ponaivi.

Ua fautuaina tagata e malaga mai i Samoa i auala o puipuiga o i latou i le faaaogā o spray e tutuli ai namu, o le momoe i tainamu ma le faaaogā o faaasu namu.

Ua fautuaina foi ia faaaogā laei poo ofu e tatapuvae ma tatapulima ina ia ufiufi ai le tino mai le aafia i namu.

O faamaumauga lata mai ua faailoa ai le faaopoopo pea o le numera o tagata ua maua i le dengue fever poo le fiva o ponaivi.