E $4 miliona le fesoasoani amata a le malo ua faamatuu mai mo le aufailafumanu faapea le aufaitogalaau ua aafia ona o le afā.
Saunoa le minisita o faatoaga Damien O’Connor o lenei fesoasoani ua aumai e amata ai a o faaauau pea iloiloga e iloa ai le tau atoa o mea ua faaleagaina i le North Island ona o Gabrielle.
O lea o loo galulue le sui o le matagaluega o Primary Industries ma le aufailafumanu e fesoasoani i le fafagaina o meaola aemaise o le vaaiga lelei a o fememea’i ai le toatele ona o lea ua tele ina faaleagaina fale na faamoemoe iai le vaaiga lelei o lafumanu.
O le luitau tele o loo iai nei galuega a le matagaluega o le lē mafai ona maua o fesootaiga ma le isi toatele o le au failafumanu ona ua motusia uma itu tau fesootaiga atoa ma le leai o se eletise.
E ese mai la i le pitolaau a le malo, i luga o le Facebook o lea e iai nisi o failafumanu mai le South Island e lei aafia i le afā ua fesoasoani ane i failafumanu faapea nisi o faifaatoaga i le North Island o loo pagatia e ala i le ofoina o meaai mo manu faapea sapalai o loo moomia vave.
