E toalima tagata maliliu i totonu o le 24 itula ona o faalavelave tau taavale, ma ua toe augani mai ai le ofisa o leoleo i avetaavale e ave ma le faautauta.
O le talosaga ua toe aumai e lē gata o le tausisi i le saoasaoa faatapulaa, mataalia a o iai i luga o le auala faapea ai ma le faia o fusipau.
Molimau a le sui o le ofisa o leoleo o faalavelave uma e tolu lea ua maliliu ai le toalima, o ni faalavelave sa ono mafai lava ona faasaoina pe ‘alo mai ai.
O lea e lei uma le masina muamua o lenei tausaga peitai o lea ua ausia le 30 o tagata maliliu ona o faalavelave tau taavale e tusa ma lipoti a le matagaluega o fela’ua’iga.
A faatusa faamaumauga nei ma le fuafuaga o loo sau ma le Road to Zero e pei ona faia e le faigamalo faatoa uma atu i le 2020, e lē o mafai ona ausia.
O se augani ua toe sau ai a o toe foi le toatele o fanau aoga i le asō mo le amatalia o aoaoga o lenei tausaga.
