O le fonotaga faavaomalo sa faatautaia i Korea i le vaiaso na tea nei e autu lea mo le toe faamautuina ma faalauaitele faigapaaga a atunuu o le Pasefika ma le Malo o Korea e ala i mataupu tau i le siosiomaga ma suiga o le tau. 

O le Afioga Toeolesulusulu Cedric Schuster o le Minisita o loo gafa ma le Matagaluega o Siosiomaga ma Turisi na auai i lenei fonotaga faatasi ai ma le Amepasa o Samoa i Fiti, Afioga Aliioaiga Feturi Elisaia ma le Sui Ofisa Sili o le Ofisa a le Vaaitau, Afaese Luteru Tauvale ma nisi o sui mai Matagaluega a le Malo. 

E mai pepa o faamatalaga a le Malo, o le saunoaga autu na tatala aloaia ai lenei fonotaga sa saunoa ai le Minisita o Faigafaiva a Korea Seung-hwan Cho i le tāua ai o lenei fonotaga a le Malo o Korea ma Malo o le Pasefika.

“Ia avea lenei fonotaga e maua ai ni fofo i nisi o mataupu auā atina’e faaauau a Korea ma atunuu o le Pasefika.” 

I lenei lava fonotaga sa faatinoina ai nisi o folasaga ma talanoaga i mataupu i le faatupulaia ai o suiga o le tau, o le itu tau i faigafaiva aemaise siosiomaga faasao.
  
Na faia ai foi se folasaga e autu i vaega o ogasami ma le poloketi e tali atu ai i aafiaga lea o loo faatupeina e le Malo o Korea e tauala atu i le Matagaluega o Faigafaiva ma sa taimua ai le Sui Ofisa Sili a le Ofisa a le Vaaitau e fai ma sui o le Malo mo le faalauiloaina atu o lenei vaega.

O lenei poloketi o loo silasila iai le Matagaluega i le mataituina lea o pole o loo iai i le gataifale ma faatupulaia ai le tomai o tagata faigaluega i le aoina mai o faamaumauga.