O loo faatasitasi i Fiti Minisita o le Va-i-Fafo a atunuu o le Pasefika e aofia ai ma Samoa lea o loo auai ai le tamaitai Palemia ia Fiame Naomi Mataafa e feagai ma nisi o talanoaga i mataupu e ao ina ave ai le faamuamua mo le Pasefika.
O lenei fonotaga o loo taitaiina e le Palemia o le Atu Kuki a o loma ai le fonotaga a taitai o Malo lea o le a faia i le Atu Kuki.
O se tasi o mataupu tāua o lea talanoaina o le fuafuaga faataatitia poo le 2050 Strategic Plan ma o lenei fuafuaga o le a tuuina lea i le fonotaga a taitai o Malo.
Saunoa le Faatonu o le Pacific Island Forum, Henry Puna e tusa ai o lenei fonotaga.
“O lenei fonotaga o le a faailoa ai nisi o iuga o fonotaga ua mae’a faafoeina e aofia ai le fonotaga a taitai o tina ma tamaitI i le Pasefika, o le fonotaga a Minisita tau le tamaoaiga, fonotaga a Minisita o Faigafaiva ma o nei vaega uma e iloa ai le tele o le galuega e ao ina faatino.”
Faaalia i nisi o lipoti mai lenei fonotaga na maua ai le avanoa e feiloai ai nisi o taitai o Malo mai nisi atunuu o le Pasefika e feiloai ai i le Palemia o Samoa e aofia ai Mark Brown o le Palemia o le Atu Kuki.
I nisi o mataupu sa faasoa ai e aofia ai tulaga o femalagaa’iga i vaalele, itu tau tagata tafafao maimoa mai fafo, o le avanoa o tagata faigaluega ma nisi.
