O le taitai o le Malo le afioga i le tamaitai Palemia, Fiame Naomi Mataafa, o loo taitaia le usugafono a Samoa i le fono lona 52 a taitai o le Pasefika, ua talimalo ai le atunuu o le Atu Kuki i le vaiaso nei.
O le Aso Gafua le amataga o lenei vaiaso fou o le a tatala ai i le afiafi lea fono faaletausaga a taitai ona faagasolo ai lea i lenei vaiaso o fonotaga ma o nisi o mataupu o le a talanoaina ai, o le filifiliga o se sui mai Malo o le Atu Maikoronesia e avea ma faauluuluga o le ofisa o Malo o le Pasefika i Fiti, lea o loo tauaveina e lē sa avea ma Palemia o le Atu Kuki o Henry Puna.
O lē sa avea ma Peresitene o le atunuu o Nauru, Baron Waqa o loo iai le talitonuga o le a see atu e tauaveina lea tofiga, peitai o loo iai atugaluga ona o se tasi lea o taitai sa aafia tele ana pulega malo i ni gaioiga na lepeti ai le tutoatasi o le faamasinoga a Nauru, aemaise o le lē lelei o pulega a lea taitai o tagata sulufai sa faamautu i Nauru.
Ua faailoa e le taitaifono o le Fono a Taitai o le Pasefika le palemia o le Atu Kuki o Mark Brown i lipoti a le leitio faavaomalo a Niu Sila, o le taua a Isaraelu ma le Hamas o se mataupu o le a folasia foi i le laulau a fono e ese mai mataupu masani e pei o le atinae o atunuu taitasi.
O le mataupu lea ia Isaraelu e lei tutu faatasi ai atunuu o le Pasefika, ona e iai atunuu e pei o Samoa e lei palota i le faaiuga a Malo Aufaatasi e taofia le taua.
O isi atunuu sa tetee i lea faaiuga, ae o isi atunuu sa lagolago.
I le fono lava lona 52 a taitai o Malo o le Pasefika i le Atu Kuki, ua faatulaga e fono ai ma taitai o Malo o le Atu Melenisia i le latou faalapotopotoga ua ta’ua o le Melanesian Spearhead Group le MSG, faapea foi ona fono ai ma taitai o Malo Polenisia le Polynesian Leaders Group, lea na uluai faavaeina e Samoa i le masina o Novema o le tausaga e 2011, ae usuia le uluai fono a taitai o le faalapotopotoga i le Atu Kuki i le tausaga e 2012 i le masina o Aokuso.
