O le fonotaga lona 13 lea a Minisita o Tina ma Tamaitai a Malo o le Taupulega lea na faamae’aina i le aso ananafi na faailoa mai ai i lipoti o faamatalaga mai le Matagaluega o Tina ma Tamaitai lea na auai ai le Minisita o Tina ma Tamaitai, Afioga Leota Laki Lamositele Sio o le Ofisa Sili o Pulega a le Matagaluega faapea ai ona sui lagolago.
O lenei fonotaga na amatalia mai le 1985 ma o loo maua avanoa mo Minisita ma sui uma o loo auai ai e folasia nisi o mataupu e agai lea i le autu o le fono o avanoa tutusa mo se lumanai manuia.
O loo faafoeina e le Malo o Bahamas lenei faatasiga ma o se fonotaga e faia fai filifiliga a sui mamalu o loo auai ai e toe auiliiliina nisi o vaega ua ausia ma nisi o mataupu o loo ave ai le faamuamua a Malo o le Taupulega e aofia ai le sao o tina ma tamaitai i tofiga taitai, o le unaia o tina i le atina’eina o tamaoaiga, taofia lea o sauaga faasaga ia i latou ma suiga o le tau.
O le tausaga nei lea o loo faatāua ai le auai o tina ma tamaitai e iai aafiaga tumau.
O faaiuga o lenei fono o le a silasila ai lea i mataupu e agai i avanoa tutusa lea o le a tuuina i le fonotaga a Malo o le Taupulega e faatino i Samoa nei i le tausaga fou.
O le tausaga 2016 sa talimalo ai Samoa i lenei fonotaga i lona autu o avanoa tutusa mo atina’e faaauau i Malo o le Taupulega.
