O le afioga i le Kovana Sili o Niu Sila o le a avea ma malo faaaloalogia i le vaiaso o faafiafiaga o le faailogaina o le 60 tausaga o le Tutoatasi, e pei ona faailoa ai i le polokalame a le komiti o tapenaga i le latou faalauiloa o polokalame o lea faamoemoe i auala o faasalalauga ma luga o le api o foliga.
O le Aso Gafua e pei ona faailoa ai i lea faalauiloa, o le a faia ai le tulai faaaloalo a Malu o le Malo i luma maota o le Malo i le eleele fou i le Aso Gafua a sau, o le a asiasia e le Kovana o Niu Sila o le sui lava lea o le afioga i le Tupu Tamaitai o le Malo o Peletania.
Ua faailoa foi e le komiti se suiga i tapenaga, o le faia uma lea o polokalame e pei o faafiafiaga, i le nofoaga o le Matagialalua Friendship Park i tua maota o le Malo o Fiame Mataafa Faumuina Mulinuu II i le eleele fou.
O lea suiga na faamautu e le komiti autu e taitaifono ai le afioga i le tamaitai Palemia i lana fonotaga i le ogatotonu o lenei vaiaso. O le fitu o itumalo ua tapena mai mo faafiafiaga faaleaganuu e faia i le nofoaga lea i le Aso Tofi a sau, ua faailoa ai e le komiti e fa itumalo ua lautogia mai Savaii, ma le tolu i Upolu.
O itumalo i Savaii o le a faafiafia ai e pei ona faailoa lava e le komiti, o Salega 2, Gagaifomauga 1, Gagaemauga 1, ma Faasaleleaga 4. O itumalo i Upolu o Falealili 1, Sagaga 4, ma Lefaga ma Faleaseela.
O le Aso Lua a sau e faia ai le polokalame o le 60 tausaga o le tutoatasi i Savaii lea o le a faia ai foi faafiafiaga ma savali faaaloalo.
O loo faatulaga mai i le polokalame o le Aso Faraile le aso 9 o Setema o le a faia ai le koneseti a le Punialavaa i le nofoaga i le eleele fou o le a tapuvae tasi uma iai faafiafiaga ma isi tapenaga.
Ona taualuga ai lea i le tauvaga e saili ai se Tausala o Samoa lea e toavalu tamaitai o le a tausinio ai, toaono mai Niu Sila, Ausetalia ma Amerika, ae toalua tamaitai tauva i Samoa.
