O le auai ai o Samoa i le fonotaga a le Western and Central Pacific Commission (W.C.P.F.C.) e usuia i tausaga taitasi e patino tonu lea i mataupu tau faigafaiva.

O le aumalaga a nisi o sui usufono mai le Matagaluega o Faigafaiva e pei ona faailoa ai o loo taitaiina lea e le Minisita, Afioga Laaulialemalietoa Leuatea Polataivao Fosi Schmidt faatasi ai ma le Pule Sili, Seuseu Dr. Joseph Tauati.

O le W.C.P.F.C. o se komisi lenei e nafa ma le mata’ituina ma faatino gaioiga e puipuia ai nisi o i’a e pei o le tuna ma ona ituaiga.

O le fonotaga foi lenei o le a faailo ai le tele o mataupu eseese aemaise o faiga filifiliga i vaega e manuia ai lenei itu o atinae a le Pasefika e ala i le tamaoaiga o loo maua i ona ogasami.

O le a faaauauina ai le talanoaina o nisi o mataupu mai le fonotaga i Vietnam e aofia ai felafolafoaiga i vaega tāua o le soifua maloloina o taumafa gaosia mai le tuna aemaise ai o le lipotia ai o le fagotaina faasolitulafono o ogasami o le Pasefika.

Mo Samoa lava ia o le auga ma le faamoemoe ina ia galulue faatasi i lenei komisi e ala i le gafataulimaina ma le puleaina o le fagotaina o ogasami o le Pasefika.

E silia ma le 500 sui usufono mai le Pasefika, Amerika ma Asia o loo auai i lenei fonotaga.