O le vaiaso fou i Niu Ioka o le a tulai ai le Tamaitai Palemia o Samoa Afioga Fiame Naomi Mataafa o se tasi o taitai o atunuu 193 o sui o Malo Aufaatasi i le Fonotaga o Sini Autu o Atinae Faaauau a Malo Aufaatasi. O le a ia faaleo le faisao atu o Samoa i le faatelevaveina o le faatinoga o ia Sini autu.
O se tauaofiaga tāua lea a Malo Aufaatasi o le a toe tagai ai ma toe siaki le faatinoga mo le ausia o nei atinae faaauau.
A o lei faia lea tauaofiaga sa tauaofia lo tatou malo ma ofisa o le UN i Apia nei ma faatino ni faatalanoaga e faatatau lava i Sini Autu o Atinae Faaauau nei, ma o Samoa le atunuu lona lua i le Pasefika ua talimalo i ia faatalanoaga, ma o se laasaga tāua tele lea i le agai atu i le tauaofiaga lea i Niu Ioka.
O loo faailoa ai le maoae o le lagolago a lo tatou malo i le taumafaiga e ausia Sini Autu o Atinae Faaauau nei, e lē gata i lea ua ta mau foi ia Sini autu i le atinae o lo tatou malo ina ia faatupu le nofo lelei ma, saogalemu ma le ola saoloto mo tagata uma.
A o tatou agai atu ai la i le ogatotonugalemu o le ala i le ausia o nei Sini autu i le tausaga 2030, sa faatinoina se suesuega i le tulaga i le faagasologa ma luitau o lenei faamoemoe.
Ua maua ai o le Koviti-19 ua tele ai le aafiaga o nei sini autu ma ua molimauina le aafia ai o ni matatia ausia ona o le faama’i.
Ua faailoa mai e silia i le 30 pasene ua toe solomuli ai faatinoga mo Sini Autu o Atinae, ua na o le 12 pasene o Matatia o loo faaauauina pea ae o le faagasologa ma galuega ua palasi mai i le 50 pasene ua telegese ai ia taumafaiga i le lalolagi atoa.
Ae mo Samoa lava ia ma ana taumafaiga o se itu tāua tele lea ma laualuga i galuega i lo tatou atunuu.
O le aso 5 o Setema sa faagasolo ai faatalanoaga ma tuuina mai ai le lipoti a le Malo o loo faailoa manino mai ai le tulaga i le faagasologa ua iai nei ma luitau.
O le faama’i ua ia faaitiitia le tupe maua ma siitia ai le tulaga mativa, o sauaga i tina ma tamaiti ua siitia, tulaga lē lelei o taumafa, atoa ai ma faafitauli o le mafaufau
Ua pa’ū maualalo ai le Sini Autu o Atinae a Samoa i le 9 pasene.
E tusa ai la o suesuega faavae a Malo Aufaatasi e tatau ia Samoa ona faamuamua, le faagasologa lelei o taumafa, faia ni Faiga e maua ai galuega a tagata, ia amanaia le soifua laulelei o tagata lautele, tausia lelei siosiomaga mo le ola lelei o laau ma meaola ma suiga ogaoga o le tau.
O le sao o Samoa i le taumafaiga o Sini Autu mo Atinae lea e tatau ona ausia i le 2030 o se molimau lea ona o Samoa o se tasi mai le numera toaitiiti o atunuu o le SIDS ua tuuina atu lona manatu e faatatau i Sini Autu o Atinae Faaauau ma tulaga ua ausia, ua fuafua foi e tuuina atu le isi ana lipoti i le 2024.
Ma o Samoa le isi atunuu mai le numera laitiiti o atunuu o le lalolagi o loo auai i le faatautaiga o lipoti nei.
