O le faaaliga tele o oloa gaosi i mea tau faatoaga lea o le a faia i Guangzhou i Saina o le a auai atu ai le Minisita o Faatoaga ma Faigafaiva, Laaulialemalietoa Leuatea Polataivao Fosi Schmidt, sui o le Ofisa o Suesuega Faasaienisi le Scientific Research Organization of Samoa(S.R.O.S.) ma nisi o sui faipisinisi.

Na faailoa ai e le Minisita i le faamoemoe o le aso a le Matagaluega lenei fuafuaga.

“O oloa uma lava o loo gaosi e le S.R.O.S. o oloa na lea o le a ave i le faaaliga oloa tele lava o le a faia i Guangzhou Saina.”

E pei ona faaalia ai i se tasi o ana polokalame nisi o nei oloa o le a tuuina atu mo lenei faaaliga.

“O loo iai foi ma nisi o oloa o loo gaosi e iai le pauta o le ava, pauta o le tumeric, nonu juice ma le vai lea e tapena uma e ave.

“O le faamoemoe lava ina ia maua ni maketi lelei toe tetele mo le tatou export authority.

“O le agaga lava ia matala mai le tulaga o loo tatou galulue e le gata ina ia fai oloa e maua ai le tau sili atu ae ia fai le auala e maua ai le seleni.”

E pei ona iai le autu o auaunaga a le Ofisa o Suesuega Faasaienisi, na saunoa Laauli ua mae’a le taimi o lea vaega ae o le agai loa e atinae.

“O lea la ua atinae lea e iai le tatou falaoamata ulu, talo, fa’i o ā uma ituaiga mea ia na gaosia lea o le a ave i le faaaliga lea.”

O le vaiaso fou o loo fuafua e malaga ese atu ai mo lenei faaaliga.