Ua atoa Samoa i le malaga a le faaili lauiloa le Punialavaa, ina ua taunuu i Amerika Samoa i le amataga o le vaiaso nei, ona o se valaaulia e faafiafia i le faamanatuina o le vaiaso ua faatāua ai le vaaia lelei o o tatou tagata e aafia i le gasegase o le Alzheimer, lea e iloa tele i auga o le galogalo o mea, ma e talitonu le toatele o o tatou tagata a aafia ai se tasi i ia tulaga, o se tagata ua valevale matua.
Ua fetaui foi le iai o le Punialavaa i laufanua o Tutuila ma Manu’a ma le Aso Faafetai poo le Thanks Giving Day o se aso faamanatu tāua i le Malo tele o Amerika ma ona teritori.
Ua faailoa mai e se sui o le fā’ili e ese mai a latou faafiafiaga o le latou valaaulia, o le a faia se latou koneseti tele e ulufale fua uma ai tagata e le totogia, e pei foi ona sa faia i Samoa Tutoatasi a o faafiafia ai i le masina o Setema i le taimi o faafiafiaga o le 60 tausaga o le Tutoatasi.
E le gata sa faafiafia i Upolu le fā’ili ae sa masii foi i le motu i Savaii ma toe taliu ai i Niu Sila ua faamautu ai le Punialavaa ae o lea ua i totonu o Amerika Samoa.
