O le aso a taeao, 24 o Me 2022, e atoa i ai le tausaga talu ona faatautoina aloaia ai le vaega faaupufai a le FAST e avea ma faigamalo e pulea le ta’ita’iga o Samoa. O se aso ua tutasi i le talafaasolopito o Samoa, e ui lava o le faatautoina o se faigamalo fou, e lē o se mea fou. Peitai o le taunuu ai o le FAST i lea aso tāua, sa lei avea o se savaliga to’afilemu e pei ona sa faatalitalia e tagata Samoa uma aemaise le silamiō mai a le lalolagi atoa.
E tele taeao faitaulia masani o Samoa, ma o le tulai mai o le uigaese o le aso 24 o Me 2021, ua avea ai o se tasi o taeao faitaulia o Samoa, ona e ui sa faatautoina lenei faigamalo fou i lalo o se fale’ie i luma ane o le Maota Fono o le Palemene o Samoa, le maota sa tatau ona faataunuu ai i totonu lenei sauniga mamalu, ae o le a lē mafai ona galo lea aso na matuā faamautinoa ai i le lalolagi atoa, e malosi le faatāua e Samoa o pulega faatemokalasi, ae silisili ai le faatāua e le faigamalo ua tulai mai i le ta’ita’iga o le Malo, e leai se tasi ei luga atu o le Tulafono.
O le poloaiga mai le Faamasinoga Sili, e tatau ona tauaofia le Palemene a Samoa i totonu o le 45 aso talu mai ona mae’a le faigapalota o le aso 9 o Aperila, o le aso 24 o Me 2021. Pagā lea, e lē o le iuga lena na taunuu i ai le sailiga malo a Samoa mo lenei paeaiga lona 17.
O le faasologa lenei o nisi o aso faitaulia ma mea na tutupu mai ai seia oo i le aso 24 o Me 2021, ina ua faatautoina le faigamalo lona 17 a Samoa, e tusa ai ma aiaiga o le tulafono, ia faia le faatautoga i totonu o le 45 aso talu ma ona mae’a le faigapalota lautele a le atunuu.
Aso Faraile, 9 Aperila 2021
Mae’a le faigapalota lautele a le atunuu, ma i le faitauga muamua o le iuga o le faigapalota, ua tulai mai le aofaiga o sui manumalo a vaega faaupufai a le HRPP (Human Rights Protection Party) e 24, o le FAST (Faatuatua i le Atua Samoa ua Tasi) e 25, o le vaega faaupufai a le Tautua e toatasi o le afioga Tamalēta Taimang Jensen, ma le toatasi o Sui Tuto’atasi o le afioga i le Sa’oalii, Tuala Tevaga Iosefo Ponifasio. Faatalitali le atunuu poo fea o itu faaupufai o le a agai i ai le Sui tutoatasi e lagolago ma maiua ai le numera sili e 26.
Aso Gafua, 12 – 16 Aperila 2021
O le faitauga aloaia o le faigapalota, ua ua toe suia ai le aofai mo le HRPP ina ua toe suia le tofi o le Vaimauga 2, ma tulai mai ai le sui o le HRPP, Lenata’i Victor Faafo’i Tamapua, ma ua suia ai foi le aofaiga mo le vaega faaupufai ua tutusa ma le FAST i le ta’i 25, a o faatali ai se filifiliga a Tuala poo fea le vaega o le a auai atu i ai.
Aso Lulu, 21 Aperila 2021
Afio Tuala e feiloai ma lona itumalo ma logo i ai o le vaega faaupufai a le FAST o le a agai e lagolago. O le po o le aso lava lena na faafuase’i mai ai le malelega a le Ao o le Malo, ma faalauiloa mai ai le tofia o le faletua ia Aliimalemanu Alofa Tuu’au e avea ma sui tamaitai e atoa i ai le to’aono o tamaitai mo le 10% o nofoa o le Palemene e tatau ona nofoia e sui faipule tamaitai.
Aso Lua, 4 Me 2021
Sau le malelega mai le Ao o le Malo, Afioga Tuimalealiifano Vaaleto’a Sualauvi II, talu ai ua tutusa le aofai o sui auai o vaega faaupufai uma e lua, o le a toe fai ai le faigapalota i le Aso Faraile, 21 Me 2021.
Aso Gafua, 17 Me 2021
Lu’i e le FAST le faaiuga a le ofisa faipalota, ma fai ai le faaiuga a le Faamasinoga Maualuga, e faaleaogāina le faaiuga a le ofisa faipalota na tofia ai se sui tamaitai faaopoopo e avea ma sui usufono o le palemene. Manino mai le iuga, ua sili le aofai o sui o le vaega faaupufai a le FAST i le 26, tumau pea le HRPP i sui e to’a 25.
Aso Toonai, 22 Me 2021
Malelega faafuase’i mai le Ao o le Malo e faaleaogāina ai lana malelega na faia i le aso 4 ma faasilasila mai ai o le a lē oo ona tauaofia le Palemene i le Aso Gafua, 24 Me 2021 ma lē faataunuuina le faatautoga o sui filifilia o le Palemene lona 17 a Samoa. Leai se mafuaaga na faailoa mo lea suiga faafuase’i.
Aso Sa, 23 Me 2021
Agai loia a le FAST i le Faamasinoga Maualuga ma lu’i ai le faaletulafono o le malelega faafuase’i a le Ao o le Malo i le po faato’ā mavae atu, ma talosagaina se poloaiga a le Faamasinoga ina ia faaauau pea ona tauaofia le Palemene i le aso e sosoo ai, Aso Gafua.
O se uluai taimi lea i le talafaasolopito o le Faamasinoga, ua faia ai ni galuega faafaamasinoga i le Aso Sa. Ta’ua i nisi o lipoti, sa nofosauni foi faamasinoga o le Faamasinoga o Apili i lena lava aso, mo se isi laasaga a o faatalia ai le iuga o le faamasinoga na lu’itauina i lena mataupu.
Lipotia le teva ese o lē tamaitai sa avea ma Loia Sili a le malo i le paeaiga ua mavae atu, Savalenoa Mareva Betham Annandale a o faagasolo le faamasinoga.
I le po na fai le faasilasilaga a lē sa avea ma Fofoga Fetalai, Leaupepe Taimaaiono Toleafoa Faafisi, o le a ia usitaia pea le malelega mai le Ao o le Malo ae lē o le faaiuga a le Faamasinoga Maualuga.
Aso Gafua, 24 Me 2021
Taunuu le vaega faaupufai a le FAST ma tagata uma sa auai atu i le faamoemoe i le malae i Tiafau. Agai atu i le Maota Fono ae o loo loka pea faitotoa. Fesiligia e le Ta’ita’i o le vaega faaupufai a le FAST le failautusi o le Fono mo ki o le Maota Fono, ae na faailoa ane e le Failautusi, e noatia ona lima ona o faatonuga mai ia i latou i luga atu o ia.
Na savavali atoa ane le saofa’iga a le faamasinoga, i le afioga i le Faamasino Sili a o faafeao atu e le Komesina o Leoleo, o faamasino uma o le Faamasinoga o Soligatulafono, faatasi ai ma le Ofisa Sili o le Matagaluega o Faamasinoga ma isi, ma agai atu e faamautinoa o loo loka faitotoa o le Maota Fono. Na lūlū e le Faamasino Sili ‘au o le faitotoa ma faamaonia o loo loka, ona toe foi atoa lea i le Maota Faamasino. Faatino le faatautoga o sui filifilia o le Palemene mai le vaega faaupufai a le FAST. E lei auai sui filifilia a le vaega faaupufai a le HRPP, ae sa auai uma i le latou apitaga i Petesa.
Na tuumuli ese atu le vaega faaupufai ma a latou loia ma agai i le maota o le latou ta’ita’i mo sina taimi, a o nofonofo ai pea le toatele o tagata lagolago ma faatalitali ai i totonu o le fale’ie ma nofoaga tau lalata ane mo le isi vaega o le a sosoo ai.
Mulimuli ane i le agai i le afiafi, na toe potopoto uma ane le vaega faaupufai a le FAST, o faafeagaiga, le afioga i le Tama Aiga, Tupua Tamasese Efi ma le Masiofo Filifilia, o tupu ma e’e o le atunuu, o sui lagolago uma a le malo, ma amata loa le sauniga aloaia mo le faatautoina o sui faipule e to’a 25 a le vaega faaupufai a le Faatuatua i le Atua Samoa ua Tasi, afioga i le Palemia, le Fofoga Fetalai, ma sui faipule uma o le vaega faaupufai. O le aso foi lea na faasilasila ai e le afioga i le Palemia sui o lana Kapeneta.
O lenei aso tāua i le talafaasolopito o lenei faigamalo a Samoa, o le a lē mafai ona galo i soo se Samoa aemaise ona tupulaga fai mai. O le feau tāua na momoli mai e lenei faigamalo, e tatau ona faatino mea uma ia ogatusa ma le upu o le TULAFONO. Ia manuia lou tulai mai FAST i le puleaina o Samoa!
